Tolosako gazte mugimendua jasaten ari den "jazarpen poliziala" salatu dute prentsaurrekoan. Alde batetik, salatu dute Ezpala gaztetxearen bigarren okupazioaren ondorioz, zigor ekonomikoa ezarri dietela 50 gazteri. Bestetik, nabarmendu dute gazte mugimenduko hiru militante jasatear daudela 38.000 euroko zigor ekonomikoa eta 5 urte eta 5 urte eta erdiko espetxe zigorra. Prentsaurrekoan salatu dutenez, helburu "argia" dute zigor horiek: "Sistema kapitalista heteropatriarkalaren aurka borrokatzen duen gazte mugimendua jazartzea".
Azken kasu horrek 2015 urteko inauterietan du jatorria: "Ertzainak Tolosako herriko tabernara gerturatu eta egoera tenkatu zuten, alboko taberna bateko liskarra aprobetxatuz". Liskar horien ondorioz, hiru pertsona atxilotu zituzten, "baliorik gabeko frogak oinarri hartuta".
Egoera hori salatu dute prentsaurrekoan bildutako herri mugimendu, gazte mugimendu eta hainbat eragiletako kideek. Plataforma bat sortuko dute "egoera horri merezi duen erantzuna emateko". Hurrengo asteartean, irailaren 20an, egingo dute plataformaren aurkezpena, eta herritarrei dei egin diete bertara azaltzeko.
Euskal Herri osora zabaldu dute "borrokarako" deia, ezinbestekotzat jo baitute edozein elkartasun eta konpromiso keinu: "Deia egiten diegu Euskal Herri osoko herri mugimendu eta gazte mugimenduei borrokara batu daitezen, kasu hori kokatzen baitugu herri honetan mila bider sufritu behar izan dugun zapalkuntzaren baitan".
Gazteak Kalean plataformaren komunikatua.
Prentsaurrekoaren bideoa: