Iristear da uganetarrak festa giroan elkartzeko eguna, Uganeko Santuipeko Eguna. Larunbat honetarako, irailak 17, egun guztirako egitaraua osatu dute. Eta, noski, ekitaldiei hasiera emateko apustua antolatu dute. Mattin Jauregi ikaztegietarra bere txakurrarekin batetik, eta Uganeko Luzuriaga anaiak bestetik ariko dira nor baino nor korrikan auzoko belaze batean.
Norgehiagokak eta desafioak gustuko dituzte Uganen eta aurrekoaren ondoren segan ariko dira inguruko lau segalari, bikoteka. Giroa berez izango da, baina beste puntu bat emango diote, azken urteotan bezala, Hernaniko betsolariek.
Auzo bazkaria eta afaria ere egingo dituzte, auzokideek, batez ere egun bertan bizi ez direnek, elkarren berri izateko. Bazkaria catering bitartez egingo dute, eta afaria norberak etxetik eramandakoa. Tartean haurrentzat jolasak, mus txapelketa, toka txapelketa eta saskiaren zozketa izango dituzte. Izan ere, goizean zehar saskiarentzako txartelak salduko dituzte eta baita pintxoak ere. Egunean zehar, gainera, ez dira faltako trikiti doinuak, garagardoa eta mojitoak.
EGITARAUA
Larunbata, irailak 17
11:30. Mattin Jauregi (Ikaztegieta) bere txakurrekin korrika, Uganeko Luzuriagatarren aurka.
12:30. Sega desafioa: Andoni Dorronsoro (Ikaztegieta) eta Arkaitz Arteaga (Baliarrain); Andoni Egia (Orendain) eta Jokin Garmendia (Baliarrain) aurka. Hernaniko bertsolariek girotuko dute sega apustua. Goizean zehar, pintxoak eta saskirako boletoak izango dira.
14:30. Auzo bazkaria. Bazkalondoan, mus txapelketa. Arratsaldean ume jolasak, toka txapelketa, saskiaren zozketa, eta Ezkide eta Unai trikitilariak.
21:30. Auzo afaria.