Aiztondoko errepideetan Villabona-Zizurkil Sari Nagusia jokatuko da igandean, 16:00etatik aurrera, Villabonan hasita eta Zizurkilen amaituta. Espainiako Koparako baliokidea izango denez lasterketa, punta-puntako txirrindulariak ikusteko aukera izango da. Danena eta Urkamendiren artean antolatu dute proba, Aduna, Asteasu, Zizurkil eta Amasa-Villabonako udalen babesarekin. Nazio arte mailako txirrindulariak ere lehian egongo direla iragarri dute antolatzaileek. Horiekin batera, eskualdekoak ere izango dira, Izarne Maioz asteasuarra kasu. Lehen lasterketa kadeteena izango da. Ondoren etorriko dira jubenil eta eliteenak, 17:00etan. Proba Gipuzkoako eta Euskadiko txapelketetarako ere baliagarria izango da.
Larunbatean, Tolosan
Emakumeen Tolosako Saria 18:00etan hasiko da, Rondilla kalean. Kadete, junior eta elite mailako txirrindulariak ariko dira lehian, Tolosa barruan bueltaka. Erlojuaren aurkako proba izango da, eta kadeteetan, Gipuzkoako Txapelketa jokatuko da.