Hitzordu berezi horretarako elkartu ziren asteazkenean, eta bertan izan zen Mikel Loidi amezketarra. Denboraldi honetan ez du Tolosa CF-rekin jokatuko, futbola uztea erabaki baitu, baina Realaren aurkakoa ez du galdu nahi izan amezketarrak, eta agurreko partida jokatuko du larunbatean.
Sarrerak salgai
Larunbateko partidarako sarrerak salgai daude Berazubiko bulegoan, 16:00etatik 20:00etara. Egunean bertan, goizez sarrerak erosteko aukera egongo da, 11:00etatik 13:00etara, Berazubiko bulegoan eta Iurre nahiz 66 tabernetan.
Arratsaldean ere jarriko dituzte salgai, oraindik gelditzen badira. Lehiatilak 16:30ean zabalduko dituzte Berazubin. Bi sarleku egongo dira: egungo lekutik eta Berazubiko plazako ate handitik.
Tolosa CF taldeko kideek zaletu guztiak gonbidatu dituzte partidara, bi taldeetaz gozatu eta urdinak animatzera.