Imanol Zubelzu lehendakariaz gain, Irati Artutxa, Miriam Arandia, Leire Zabala eta Armintz Gorrotxategik osatuko dute kofradia.
Nerea Letamendi Merkataritza, Feria eta Turismo zinegotziak, Jose Miguel Gomez orain arteko Maisu Handiak, Imanol Zubelzu lehendakari berriak, Juan Manuel Garmendia FECOGAko presidenteak eta Olatz Peon Tolosako alkateak hartu dute hitza ekitaldi ofizialean.
Guztiek nabarmendu dute babarruna Tolosaren "izanaren" parte dela. Orain arte kofradiak egin duen lana eskertu, eta animoak eman dizkiete kofradiren gidaritza hartu duten gazteei.
Bestalde, kofradiaren logo berria ere aurkeztu dute. Leire Zabalak egindakoa da, eta bi esanahi nagusi ditu: "Alde batetik, babarrunaren kolore diferenteak adierazi nahi izan ditugu: babarruna landatzen dugunetik, jaten dugunera arte dituen koloreak; bestetik, babarruna Tolosaren izana dela azpimarratu nahi izan dugu".
Amaitzeko, Tolosako Udalak eta Babarrunaren Kofradiak lankidetza hitzarmena sinatu dute.