Atseden hartzeko egunak izan ohi dira udakoak, oporrak eta egun luzeak tarteko. Baina, teoriak hori badio ere, udaren hasieran piztu eta irailera bitarte itzaltzen ez den kultur agendak bizi-bizi mantentzen du herritarren agenda, sorterrian nahiz kanpoan.
Tolosako Aranburu jauregia ere agenda hori betetzearen errudunetako bat da, kultur etxeko tailerretako ikasleen eskutik, izan ere, erakusketen sokak ez du etenik izango urtaro maitatuenetako batean.
Ikasturte osoan barrena, gerizpean ikasi, landu, egin, zuzendu, desegin eta gorpuztutako arte lanak herritarren begiei oparitu dizkiete, beste behin, tailerretako ikasleek, eta diziplina anitzeko erakusketa ederra osatu dute. Sanjoanen atarian inauguratu zuten, eta larunbatera bitarte ikusgai izango da.
Argazkigintzako tailerretik hasi eta ehozirien, pinturaren, zeramikaren nahiz eskulanen trikimailuetan trebatzen aritu diren 134 herritarrek jarri dute beren alea, Aranburu jauregiko beheko solairua hartu duen erakusketan. Halaber, Txinparta elkartean sanjoanetan antolaturiko pintura lehiaketako lanak ere ikusgai dira.
JOAN BAIXAS, ORAINDIK IKUSGAI
Topic zentroko erakusketen epeak Aranburu jauregikoak baino luzeagoak izan ohi dira, eta martxoan Joan Baixas artistak inauguraturiko Eroen ontziak nabigatzen darrai, Euskal Herria plazako txotxongiloen etxean.
Sortzaile bartzelonarrak liburuak darabiltza bere ideiak Eroen ontzian bideratzeko, eta liburuez gorpuzturiko instalazioak dira nagusi, beraz, Mangoneos izendaturiko pieza txikiekin eta pintura zenbaitekin erakusketa osatzeko. Datorren urriaren 2ra bitarte ikusgai izango da Baixasen lana.
Hilabetez hilabete, ikasturtearen erritmora landutako edukiak gorpuztuta, kultur etxeko tailerretako ikasleek erakusketa anitza osatu dute Aranburu jauregirako.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!