Ohiturari jarraituz, goizeko 05:15ean bildu dira Udaberri Dantza Taldeko bordondantzariak. Furgonetak hartu eta Monteskura abiatu dira, Tolosa berdez janzten duten lizarrak hartzera. "Gogor hasten dugu eguna, baina hasieratik pasioz bizitzen dugu", aitortu dute dantzariek lizarrak jartzen ari zirela.
Taldetan banatu eta lehen tolosarrak esnatzerako dotore-dotore jarria zuten Alde Zaharra. 08:30ean Tolosako Musika Bandarekin edota eskopetari konpainiaren batekin esnatuko ziren beste asko.
Urtero moduan, Desperta en Enguera eta Anunciación de la Jota kantuekin Tolosako kaleak zeharkatu dituzte musikariek. Eskopetari konpainia guztiek, berriz, 09:00etan Euskal Herria plazan egin dute lehen salbea batera.
Handik Plaza Zaharrera abiatu dira, eta udal gobernua agurtu ondoren, banan-banan bota dituzte tiroak. Txukun hasi dira.