Hilaren 26ko Espainiako Gorteetarako mezuei ekiteko, euskal ahotsek Madrilen duten garrantzia helarazi nahi izan zien, Marian Beitialarrangoitiak, herritarrek egindako galderei erantzunez: "Zenbaitek botoa alderdi handiagoetara bideratzen dute, botoa erabilgarri egitearren, baina, gure txikian, euskal ahotsa Madrilera eramango dugun talde politikoak ezinbesteko gara, euskal gizartearen interesak defendatzeko".
Bide horretan, hautagaiak "argi" dauka elkarlana behar-beharrezkoa izango dela, alderdi abertzaleen artean, eta EAJri horretarako asmorik ez azaltzea egotzi zion: "Ez dut ulertzen EAJk zergatik ikusten duen EH Bildu etsai gisa, etsaia Madrilen duen bitartean. Bide horretan, harrigarria da, EH Bilduri tratu hori ematen dion bitartean, Borboiari Donostian harrera egiteko arazorik ez izatea".
Azkenik, Podemosi begira ere jarri zen Beitialarrangoitia, Iglesiasen alderdiak "Euskal Herrirako eskaintzarik ez" duela azpimarratuz. Espainiako telebista kateetan emititu berri den debatea ekarri zuen gogora, eta bertan erabakitzeko eskubidearen inguruan izandako iritzi trukea hizpide izan zuen EH Bilduko hautagaiak: "Bueltan-bueltan, laurek gauza berbera proposatu zuten: konstituzioa aldatuta soilik gauza litekeela erabakitzeko eskubide hori eta, horretarako, baiezkoa Espainia osoak eman beharko duela. Argi dago, beraz, Podemosentzat erabakigunea non dagoen, Espainian".