Ikasturte amaiera ukitzen eta usaintzen ari dira ikasleak. Oporretara joan aurretik berriz komunikazioaz hausnartzeko eta kazetaritza lana bertatik bertara ezagutzeko aukera izan dute Tolosako Samaniego ikastetxeko Lehen Hezkuntzako 5. mailako ikasleek.
Muinean, bisita hauen helburua bertakoa eta gertukoa den komunikabidea ikasle hauek ere gertu sentitzea da, kazetaritza lana zer eta nola egiten den ezagutuz. Komunikazioa erabat oinarrizkoa izanik, lanbide ere badela. Ikasleei gainera ikastetxean bertan landutakoa ere praktikan jartzeko aukera txikia eskaintzen zaie, Ataria irratiko Pasahitza magazinean zuzenean parte hartuz.
Ikasturte berrirantz
Honela, Tolosaldeko Ataria-k abian jarritako Ikasiz erakutsi 2015-16 egitasmoari amaiera eman zaio Samaniegoren partaidetzarekin. Hala ere, ikasturte berria asmo eta sukaldean dauden ideia berriekin ere etorriko da. Ataria-k, geroko komunikatzaileekin hasitako bideari eutsi eta elkarlan horretan sakontzea helburu baitu.