Tolosaldeko artisauen merkatua da Made in Tolosa, Alex Arozena BOX.A elkarteko kidearen esanetan artisau horiek "ezagutarazteko" helburuarekin sortu dena, eta bertan denetatik aurki daiteke: "egurrezko artelanak, pitxiak, panpinak, poltsak...".
Hala ere, aurten merkatuaz gain bestelako berrikuntza batzuk ere gehitu dizkiete, "jende gehiagorengana" heltzeko asmoz eta azoka bera "desberdintzeko" asmoarekin. Besteak beste, janari postu bat aurki daiteke, meriendatzeko edo afaltzeko. Horrez gain, txikienek parte hartzeko txapa tailerra ere egin dute.
Musikari dagokionez, Soka Artean bikoteak eskaini du kontzertua azoka "girotzeko" eta "jendea gustura egoteko". Ondoren, ostegunero BOX.Ak egiten duen Jam saioan parte hartzen duten musikarien txanda izango da: "Ostegunero edozein musikari gonbidatzen dugu agertokira igo eta musika jo, inprobisatu edo kantuen bertsioak egitera, tarte on bat pasatzeko.Terrazan, Jam sesioa egingo du jende horrek". Gauean, 22:00etatik aurrera, Peachy Joke talde tolosarraren txanda izango da, aspaldiko partez etxean eskainiko baitute etxean. Aldi berean, Gin Tonik gaua ere izango da.
Honakoa BOX.A elkarteak antolatutako merkaturik "garrantzitsuenetakoa" da Arozenaren esanetan, eta pozik azaldu da "jende dezente" gerturatu delako bertara. Hala ere, jende gehiago bertara joatea "animatu" du: "Gustura egoteko leku asko dago, giro polita egoten da, jatekoa dago, edaria merke eta oso giro ona. Azaldu daitezela!".