"Horretan ematen ditugu gure oporrak, babarruna zaintzen". Mari Karmen Iradi ekoizle irurarrak ondo daki, jakin ere, dastamen guztien gozamenerako babarrunak zer nolako lana eskatzen duen atzetik. Uda hasterako erein, ureztatu, ondo lehortu, eta sailkatu egin behar izaten dira aleak, garbi-garbi lapikora bota ahal izateko. Eta, hain zuzen ere, horixe azaldu diete, gaur, Hirukide ikastetxeko DBH 2. mailako neska-mutilei.
Urteroko ereitearen aurretik, Tolosako Babarrunaren Kofradiako lekukoa hartu eta eragileari ikuspegi gazte eta freskoa eskainiko dion gazte taldea aurkeztu dute Imanol Zubelzuk eta Irati Artutxak; jantzia ere eraberritu dute, eta zapiak jantzi dituzte soinean.
Behin ekoizleen ezinbesteko lana azalduta, Roberto Ruiz eta Armintz Gorrotxategik errezetaren sinpletasuna pausoz pauso azaldu diete gaztetxoei: "Sekretua denbora eta mimoa dira, ez da besterik". Horrela, Ruizen iritsiz, babarruna ondare bat da, "guztiona". Lurrak emandako altxorra jaki tentagarri bilakatzerakoan, gainera, sukaldariaren iritziz garrantzitsuena sukaldera iritsi aurreko guztia izaten da: "Non erein den, zein ekoizlek egin duen, nola egin duen,... Hori guztia da babarrun onaren sekretu garrantzitsuena".
Ibaiari begira, lehen aldiz
Kofradiaren eraberritzearekin batera, ereitea burutzeko lekua ere aldatu dute aurten, eta ibaiari begira sartu dituzte babarrun aleak, lurpean: Euskal Pizkundea plazan. Ohorezko agurrarekin omendu nahi izan dute Tolosako produktu izarra, lapikora iritsi aurreko lehen pausoari ekiteko.
Tolosako Babarrunaren elkarteko kideen laguntzaz, Olatz Peon Tolosako alkatea eta Tolosako Babarrunaren Kofradiako kideak izan dira hazia jartzen lehenak, eta gaztetxoek jarraitu diete atzetik. Udazkenera bitarte, tentuz begiratu eta zaindu beharko dituzte orain, ekoizleek, gerora plo-plo lapikoak ariko diren babarrunak.