Badira jada, bi aste inguru, Tolosaldeko hiru alkatek Eusko Legebiltzarreko Osasun batzordean agerraldia egin zutenez geroztik; Invizak Osasun Sailarekin azken bost urteotan izan duen hitzarmena baloratu eta osasun mahaia eskatu zuten bertan. Bada, joan den astelehenean, ekainaren 6an, Olatz Peon Tolosako alkateak esku hartzea izan zuen batzorde berean.
Besteak beste, Tolosaldeko herritarrek jasotzen duten osasun zerbitzuaren inguruko azalpenak eskaini zituen alkateak, legebiltzarreko alderdietako ordezkariekin batera. Tolosako Udalak ez du bestelako azalpenik eman nahi izan.
Bere aldetik, Euskal Herria Bilduk beren ordezkari Rebeka Uberak batzordean aldarrikaturikoak iragarri ditu. Besteak beste, eskualdeko alkateek beren hitzorduan egin bezala, Tolosaldeko Osasun Mahaia eratzea eskatu zuen: «Interlokuzioak zabaltzeko, arazoak detektatzeko nahiz neurriak hartzeko foro jakin bat sortzea beharrezkotzat jotzen dugu, elkarrizketa gune moduan eta, betiere, arreta hobetzeko izaerarekin».
Bide horretan, EH Bilduk legez besteko proposamena aurkeztu du legebiltzarrean eta, modu horretan, talde politikoek erabakiko dute, Osasun Sailari eskualderako Osasun Mahai bat eskatu ala ez.