Aurtengo edizioan, "indarberrituta eta ilusio berriarekin" datozela esan dute Txinparta elkartekoek, "azken hiru urteetan elkarteetan egin ondoren, berriz Zerkausira aterako dugulako festa". Irekiera ekitaldia 11:00etan egin dute eta Tolosa CFko eskubaloiko senior taldea eta futboleko neska eta mutilen taldeak omendu dituzte, mailaz igotzea lortu dutelako. Jon Maya dantzariak agurra egin die omenduei, Ander eta Iñaki Letamendiaren doinuak jarraituz.
Ekitaldian izan dira, Orioko bi parrillero eta Txinparta elkarteko kideak, Tolosako udal ordezkariekin batera. Ondoren, kirolariek zinta moztuz eman diote hasiera festari.
Gaur eta bihar, bazkariak eskainiko dituzte, 14:00etatik 15:00etara eta afariak gaur gauean, 20:30tik 22:00etara. Oraindik ere azken sarrerak salgai direla aipatu dute Txinpartakoek eta bertara joateko, Tolosaldea Tourren –943 69 74 13– edo tour@tolosaldea.net posta elektronikoan eman daiteke izena.
Gaurko irekiera ekitaldiaren ondoren, Zizka-Mizka-Boga gunea ireki dute. Tolosako zazpi eragile gastronomikok osatutako txokoa izan da eta arrainarekin loturiko pintxogune berezi, animatu eta gazte bat prestatu dute. Solana 4, Barriola harategia, Batean enpresa, Txinparta elkartea, Fronton jatetxea, 18:90k eta Txomin Parrila Hazik hartu dute parte ekimenean.