Oihana Orkolaga Eskola Agenda 21eko dinamizatzaileak azaldu duenez, "urtero Tolosaldea mailan gai berdina lantzen dugu Eskola Agenda 21en barruan, eta ikasturte amaieran egiten dugu topaketa bat partekatzeko herri bakoitzean atera diren ondorioak, eta zer konpromiso eta proposamen atera diren lanketa horren ondoren. Gaur elkartu gara hemen helburu bikoitz horrekin. Alde batetik partekatzea, eta bestalde elkarrekin parte hartzea Alkizan egingo den Ingurumen Eguneko festan".
Kontsumo ekologikoa izan da ikasturte honetako gaia, eta gaur goizean egindako lanketarekin material batzuk sortu dituzte. "Horiekin erakusketatxo bat osatuko dugu Alkizan igandean erakusketako", azaldu du Orkolagak. "Kontsumo ekologikoa landu dute eta ikusi dute nola hainbat arlotan gure aukerarekin bideratu daitekeen gizarte eredu batera edo bestera. Hau da, ze inporta zaigu ikustea, edo gauza gehiago edukitzea edo gauza horiek nondik datozen eta nola ekoiztuta dauden aztertzea". Hausnarketa horretatik atera dira bilgarrien inguruko jolas bat, konpromisoen zuhaitza, ekoetiketen inguruko joko bat, urtebetetze festa bat antolatzeko ze aukera dauden... Eta horiek Alkizan igande honetan ospatuko den Ingurumenaren Nazioarteko Egunean erakutsiko dira. Hain justu, Alkizako ekitaldiez gain, Tolosaldeko beste hainbat herritan ekimenak antolatu dira Ingurumenaren Nazioarteko Egunaren inguruan.
Datorren ikasturterako aukeratu duten gaia ura da. "Ura baliabide moduan landuko dugu. Ikustea zer moduz dauden hemengo ibai eta errekak, eta ikasle helduenekin uraren pribatizazioaren inguruko aferak landuko ditugu", esan du Orkolagak.
