"Garaipen hau zuena ere bada". Hitz horiekin eskertu zuen Estanis Arsuaga, Tolosa Eskubaloi taldeko kapitainak, denboraldi osoan zehar, eta bereziki, egun hauetan zaleengandik jaso duten babesa.
20:00etan herritar multzo bat bildu zen Plaza Zaharrean taldeari harrera egiteko. Solana kaletik kalejiran iritsi ziren jokalari eta klubeko gainerako kideak, kantari. Goazen Tolosa txapeldun, lolololololo.
Udaletxeko baloira irten aurretik, Olatz Peon alkateak eskerrak eman zizkien lortutakoagatik: "Egin duzuena Tolosaren historiarako idatzita geratuko da". Jokalariek ere zorionak eta txaloak eman zizkioten alkateari, XIV orduko ibilaldia egitetik iritsi berri baitzen. Peonekin batera, bertan izan ziren Patxi Amantegi alkateordea, eta Joseba Ormazabal eta Cristian Fernandez zinegotziak.
Talde argazkia atera ondoren, balkoira irten ziren. Segituan jarri zuten plaza kantari. Datorren urteko denboraldiari begira ere mezu bat utzi zuten: "Proiektua sendotu behar dugu, eta horretarako zuen laguntza beharko dugu. Usabal betetzea lortu behar dugu".
Jarraian, egun hauetako irudi onenekin osatutako bideoa: