Normaltasuna da nagusi, orain arte, Aralarko Adiskideak taldeak antolatzen duen XIV Orduko Martxan. San Migelerako igoeran lokatza topatu dute mendizaleek baina eragozpen handirik ez dute izan bidea egiteko.
Goizeko lehen orduetatik eguraldia lagun izan dute martxan parte hartu duten lagunek. Aralarrera igotzearekin batera lehen euri tantak bota ditu, baina laster atertu du. Tenperatura egokia izan dela aitortu dute lasterkariek, "ez hotz eta ez bero".
Jendearen animoa izan da bide bazterretan. Aralarko San Migelko santutegi inguruan herritar asko egon dira, lagun eta senitartekoei animoak emateko. Mokadutxo bat elkarrekin hartzeko ere aprobetxatu dute askok, ibilbidea jarraitu aurretik. Publikoaren oihu eta txaloak bultzatu ditu mendizaleak, aldapa behera, Guardetxerantz. Han ere, jende ugari izan dute zain.
