Herri bat, kolore bat, sentimendu bat... Aupa Urdiñak! zihoen larunbatean hainbat zaletuk Berazubin jarri zuten pankarta batek. Bada, sentimendu horrek bultzatuta, tolosar askok bete zituzten harmailak. Egunak merezi zuen.
Izan ere, hortxe, begibistan, ia eskura, dauka Tolosak hirugarren mailako igoera. Are gehiago, larunbatekoaren ondoren. A zer gozatua hartu zutena zaleek. Baita sufritu ere!
Hasi orduko, lehen albisteak iritsi ziren Azkoitiatik: Anaitak 6-0 irabazi. "Gaur ez dugu igoerarik ospatuko!" Baina tira, iristen den bitartean, itxaroteko arazorik ez. Eta halako batean, oiartzuarren gola 25. minutuan.
Bi minutu baino ez zuen iraun estuasunak. Mario Zubelzuk banakoa jarri zuen markagailuan. Bide beretik jarraitzea baino ez zen falta. Eta jarraipen horrek eman zion saria 35. minutuan. Zabaletak 2-1ekoa lortu zuen.
Bigarren zatian, emaitzari eusteko asmoz irten ziren Lilloren mutilak zelaira. Oiartzuarrek ez zuten etsi, eta izan zituzten golak lortzeko aukerak, baina markagailua ez zen mugitu. Hiru puntu, eta igoera fasea, behintzat, poltsikoan.
Azken jardunaldia, baina, zaila izango da. Real Union hirugarren sailkatuaren etxean jokatuko du Tolosak, eta hark aukera bakarra du igoera faseari eusteko: irabazi eta Anaitasunak galtzea. Beraz, partida zaila izango dute tolosarrek. Puntu bakarra eskuratzea nahikoa du zuzenean hirugarren mailara igotzeko. Larunbatean izango da, Irunen, 17:30ean.
Aupa Tolosa traka tra!
Argazkiak: Itzea Urkizu