Kultiba enpresa hari da dinamizatzen egitasmoa, eta bertako kidea den Andoni Lastrak azaldu duenez, "guretzako esperientzia polita izaten ari da. Gazteek gogoz hartu dute proiektua, eta eskertzen dute beraiek izatea egitasmoaren protagonistak eta erabakiak hartzea".
Lehenengo bi saioetan hausnarketak egin dituzte, eta ondorengo hiruetan laborategiak egiten ari dira. Hernanin dantza izan zen gaia, Tolosan Hirigintza eta hurrengoan ikus-entzunezkoa izango da. "Bigarren fase batean, sorkuntza fasean, guzti honen inguruko artelan bat egingo dute, azkenean haien erronka artearen bidez adierazteko", esan du Lastrak. "Hirugarren fasea izango da sortutakoa gizarteratzea, egindako lana erakutsiz".
Lander Velazquez billabonatarra da WhatsArt egitasmoan parte hartzen ari denetako bat. "Kultura arloa asko gustatzen zait, musika, dantza eta ikus-entzunezkoak lotzen dituzten proiektuak, eta horregatik eman dut izena". Tolosan Alde Zaharra izan dira, ikusten zer egon daitekeen hobetzeko. Egitasmoaren balantze "oso ona" egiten ari da Velazquez: "Jendea ezagutzea asko gustatzen zait, eta horrelako proiektuak gustatzen zaizkigun pertsonak elkartu gara hemen".