Eskualdeko lanbide heziketa ikastetxeak galako dira, gaur, azoka eguna eurei begira jarri baita. Bertako produktuekin batera uztartu dute, bertako industria, zerbitzu eta nekazaritza lanak ikasteko eskaintza ere, eta lepo bete zaie karpa.
Orain arte Lehiberri zentroan ospatu izan duten hitzordua Trianguloa plazara mugitzea ideia paregabea iruditu zaie, bai ikastetxeetako arduradunei, bai etorkizuneko ikasleei ere. Tolosaldea Lanbide Heziketa Institutua, Inmakulada lanbide ikastola, Don Bosco paper eskola, Peñascal fundazioa eta Fraisoro eskola izan dira protagonista, Tolosaldea Garatzen eta Banaiz Bagarako postutxoekin batera.
Gazteei jaiki eta postuak bisitatzea kosta zaien arren, eguerdiak hartu ditu datorren ikasturteko balizko ikasleak. Hori bai, ikasle izateko asmorik ez duten herritar askoren jakin mina pizteko akuilu ere izan da Lanbide Azoka, hango aparailu, eskeleto, erlauntza nahiz zuzeneko bertsoaldiekin. Amaia Agirre eta Haritz Mujika aritu dira kantuan, bertso jarriak gitarraz lagunduta, eta horizontalean eraikitako hezkuntza sistema eskatu dute, besteak beste.