Urtarrila amaieran Podemos Euskadik Garbiñe Biurrun Jaurlaritzarako hautagaitzat nahi zuenaren zurrumurrua sortu zen. Biurrunek berak TOLOSALDEKO ATARIAri gezurtatu zion bera lehendakarigaia zenik, eta ez zegoela ezer esan zuen.
Gaur goizean, ordea, Euskadi Irratiko Faktoria saioan Ahal Dugu-ren eskaintzaren berri eman du . Formalki hautagaiak aukeratzeko prozesua abiatu ez duen arren, hautagaitza aztertzeko prest ote litzatekeen galdetuta, baiezkoa erantzun du Biurrunek, eta hain zuzen ere "baloratzen" ari dela. "Bloratzen ari naiz, eta zer edo zer dagoenean esango dut argi eta garbi zein den nire erantzuna".
"Orain badakit Podemosen nahiko luketela ni hautagai izatea", aitortu du Biurrunek, baina erabakia une honetan berea baino ez dela. Erantzuna laster izango dela dio: "Panorama politikoa dagoen bezala egonda, uste dut laster beharko lukeela".
Bestalde, Podemos Euskadi alderiko iturriek EFE albiste agentziari azaldu diotenez, oraingoz "Biurruni bakarrik" eskaini diote lehendakarigai izateko proposamena. Onartuko balu, "hauteskunde zerrendak erabakitzeko hauteskundeetara aurkeztu eta gainerako balizko hautagaiekin lehiatu" beharko lukeela gaineratu dute.
EAEko hauteskundeetan koalizioan aurkeztea ere ez du baztertu Podemos Euskadik, bai Equorekin zein Ezker Anitza-IUrekin. Koalizioa izatekotan, alderdi guzti horien militanteek parte hartu beharko lukete hautagaitza erabakitzeko bozketan.