Sortu berri diren, edota berrikuntza handi bat jasan duten museoei aitortza egiten die European Museum oh the Year Award sariketak. Aurten Tolosan ospatu dute sariketa hori, Topic Museoak antolatuta, eta larunbatean, sari banaketarekin eman zitzaion amaiera hiru eguneko egitarauari.
Ostegunetik hasita, Topic Zentroan 27 herrialdetako 97 museok izan dute ordezkaritza, eta 216 parte-hartzaile izan dira guztira, sariketaren baitan antolatu diren hitzaldietan.
Orotara 49 museo izan dira 2016ko EMYA saria jasotzeko hautagaiak. EMYA sari nagusia Varsovian kokatuta dagoen Poloniako Judutarren Historia Museoak jaso du. Museoen lan soziala saritzen duen Silletto Saria Kroaziako Vukovar herriko museoak lortu du. 2012an Topic bera izan zen sariduna alor horretan. Museo originalenaren Kenneth Hudson Saria, berriz, Amsterdameko Micropia Museoak irabazi du.
Horrez gain, sei aipamen ere banatu dituzte: Tegeako Museo Arkeologikoa (Grezia); Bolzanoko Museoa (Italia); Soesteko Museo Militarra (Herbehereak); Londresko Zientzia Museoko Age Gallery-a (Erresmua Batua); Manchesterreko Arte Galeriaren The Whitworth atalak (Erresuma Batua); eta Mont Beuvray-ko Bibracte Museoak (Frantzia).
Europako Kontseiluak, bestalde, Museo Onenaren sariduna nor izango den ezagutarazi zuen larunbatean bertan. Gdansk-en (Polonia) kokatuta dagoen Europako Elkartasunaren Zentroak jasoko du sari hori, hilaren 19an, Estrasburgon. EMYA Sarien 40. edizioaren kokalekua ere zein izango den argitu dute: Parisen ospatuko dute, Louvre Museoak antolatuta.