Itxaron egin behar

Itxaron egin beharko du Tolosak Aurten bai! oihukatzeko. Anaitasunaren aurkako porrotak –denboraldiko bigarrenak–, sailkapen nagusiko goiko postuetan aldeak murriztea eragin du, eta falta diren bost partidetan dena eman beharko dute tolosarrek. 

Larunbatean ere dena eman zuten Iruñean, baina talde sendoa du Anaitasunak. Hirugarren da sailkapenean eta oraindik igoera faseari eutsi nahian zenbiltzan. Ia azken aukera zuten nafarrek. Eta ez zuten pasatzen utzi.

Erritmo altuko norgehiagoka izan zen. Lehen 20 minutuetan Noguesen taldea izan zen nagusi. 5:1 defentsan oinarritu ziren tolosarrak, eta kontraerasoan min egin zuten. Iruindarrak, ordea, gogor (gogorregi akaso) aritu ziren defentsa lanetan, eta ordutik aurrera arazoak izaten hasi zen Tolosa. Kexu da Alex Nogues: "Anaitasuna intentsitatearen limitean izan zen defentsan, eta uste dut epaileek ez zutela araudia aplikatu. Horrek partida gehiago zaildu zuen". 

14-12ko emaitzarekin iritsi ziren atsedenaldira, eta bigarren zatian sinetsita irten ziren urdinak. Hainbatetan markagailua berdintzea lortu zuen, azkenekoz 22. minutuan: 19-19. Azken zortzi minutuetan nafarren defentsa gogorrak asko zigortu zituen jokalari tolosarrak eta ezin izan zuten eutsi: 24-21 azkenean. 

Emaitza baino okerragoa izan zen Aitor Diaz de Cerioren lesioa. Etxeko taldeko jokalari batek eutsi eta min hartu zuen sorbaldan, 45. minutuan. Mediku azterketaren zain dira, baina itxura guztien arabera, bihurrituta du, eta bi astez geldirik izan beharko du. 

Matematikoki igoera faserako txartela eskuratzeko aukera, beraz, aste batzuk atzeratuko da. Bost neurketa jokatuko ditu orain Tolosak. Aurkari horietatik bi, Erromo eta Usurbil, jaitsiera ekiditeko borrokan ari dira; Ereintza, Egia eta Beti Onak, berriz, sailkapenaren erdialdean daude, eta ez dute ezer jokoan.

Itxaron behar bada, itxarongo da. Larunbatean, Usabalen Ereintzaren aurka, 17:45ean. Aupa urdinak!