Gipuzkoako PSE-EEko idazkari nagusi Iñaki Arriolak prentsa ohar bidez plazaratu du bere gaitzespena, "arrazoirik gabeko indarkeria ekintza hori onartezina" dela nabarmenduz.
Jose Ignacio Asensiok utzitako lekua hilabete amaieran hartuko du Christian Fernandezek, Tolosako Udaleko zinegotzi izateko. Horrela, larunbatetik iganderako gauean kokatu dute gertakaria, Hernanitik Tolosarako tren batean. "Bat-batean sei gazte jazarri zitzaizkion, eta 'puto sociata, sociata de mierda' eta bestelako irainak zuzendu zizkioten", salatu dute. Behin trenetik jaitsita, egoera berbera errepikatu eta Fernandez berriro iraindu zutela azaldu du PSE-EEk. Horrela, Fernandezek salaketa jarri zuen Tolosako Ertzain etxean; ikerketa abiarazi dutela azaldu du PSE-EEk.
Iñaki Arriola idazkari nagusiak, bere aldetik, "guztiz gaitzetsi" ditu gertakariak: "Gizarteko zenbait pertsonak iraganean jarraitzen dute, eta erasoak eta irainak erabiltzen dituzte, indarkeriaren bideetatik aurkari politikoa beldurtzeko". Horrela, beren alderdiko militante guztiek "elkarbizitzaren eta bakearen alde lanean" jarraituko dutela nabarmenduz, euskal gizarteari ere dei egin nahi izan dio, bide horretan jarraitzeko.