"Ieeepa!". Aho batez kantatu dute Gorriti plazan Diana hasteko zain zeuden inauterizaleek, abestiaren lehen notak entzun bezain pronto. Agintari kaletik barrena ekin diote, ehunka inauterizalek, Zaldunita egun miragarriari, eta ziur askorentzat urteko esnatzerik gozoena izan dela.
Haur, gazte nahiz heldu, jeiki-jeikiren erritmoan saltoka iritsi dira ohiko geldialdietara, eta izan da balts erritmoak dantzatzera ausartu denik ere.
Dianako errege-erreginak pijamak diren arren, tolosar askok goizeko zortzietako hitzorduan beren irudimena plazaratzen dute jada, gosaldu ondorenera bitarte itxaron gabe. Horrela, azken urteotako euriteen ondorioz-edo, eguraldia iragartzeko frailearen kaxatxo erraldoia bueltaka ibili da, besteak beste.
Tolosa esnatu da, tolosarrak ere bai, eta, Ostegun Gizeneko ajeen ondoren, inauteriak ere bai. Hau hasi besterik ez da egin.