Aurreikuspenei men egin, eta San Frantzisko pasealekua sekula baino zabalago egin da, gaur, Aiz-Orratz elkartearen haur danborrada pasatzen ikusteko. Azken bi urteetako euri zaparradari, beraz, irribarre eta makil hotsen zaparradak gailendu zaizkio, eta entseguetan ikasitakoa plazaratzeko garaia iritsi zaie neska-mutil tolosarrei.
Koskakoek zabaldu dute desfilea, pandero koloretsuekin dantzatuz eta, mikeleteen muga zeharkatu ondoren, danbor errenkadak osatu dituzte haurrek, Geltokitik Trianguloa plazara bitarte. Bertan zenbait abesti jo eta gero, Aiz-Orratz elkarteak Rondilla kalean duen egoitzaraino jaitsi dira, ibilbidea osatuz.
Haur eta gaztetxoek bikain probestu dute Zaldunita bezpera, eta baita helduek ere, iluntzean abiarazi baita beren danborrada. Badator itxuraldatzea.