Tolosar inauterizale ororentzat egun berezia izaten da Ostegun Gizena. Urte osoan itxarondako egun horietako bat da: aurreko egunetako emozio eta zirrara horrengatik. Txupinazoagatik. Koloreagatik. Musikagatik. Lagunekin topa egiteagatik. Alaitasunagatik. Bakarra da Ostegun Gizena.
Bakarrak dira Ostegun Gizena eta bere giroa. Egunekoa nahiz gauekoa. Eta badira giro bikain hori borobiltzen laguntzen dutenak: elkarteak.
Elkarteentzat ere urteko egun seinalatua da. Aurreko egunetan hasten da zalaparta: datozen egunetarako mahai zozketak, elkartea bera atontzeko lanak, txarangak osatzeko gorabeherak... leku guztietan bezala, zoramena.
Baina Ostegun Gizena elkartekide eta gainerako lagunak biltzeko eguna da. Ongi pasatzekoa. Goizean hamaiketako legeak biltzen ditu gehienak, eta nola ez, txorizo edo txistorra ezin falta!
Arratsalde-gaueko xarma
Baina iluntzean iristen da benetako festa. Elkarte guztietan afariak antolatzen dituzte Inauterien hasiera ospatzeko. Eta hemen ere, ezin musika falta!
Elkarteko bazkideek eta lagunek osatutako txaranga inprobisatuak ibiltzen dira kalez kale arratsaldetik gaueko ordu txikiak arte. Noiznahi, nonahi, bada baten bat. Hobeagoak ala okerragoak, baina aski dira bizpahiru musikari giroa jartzeko. Ostegun Gizen gauak duen xarma berezi hori...
OSTEGUN GIZENA
11:30. Udal Txistulari Bandak
Inauterietako zortzikoa joz egingo du ohiko ibilbidea.
11:45. Ostegun Gizen Konpartsaren agerpena Plaza Zaharrean.
11:45. Kabi-Alai Elkarteak Gure Kaiolako gazteak
2016ko Inauterizale Kuttun izendatuko ditu.
Ondoren, pregoia.
12:00. Plaza Zaharrean, suziria .
12:00. Pintxana eta Kabi-Alai txarangen irteera Aroztegieta kaletik.
14:00. Txosnagunean Zahagi Ardoa. Zuk Jana, Txoznak edana.
16:30. Zezen Plazan zezen-festa, Pintxana eta Kabi-Alai txarangek alaitua.
Ondoren, kalejira.
19:00. Txosnagunean Egurra ta Kitto taldea.
19:30. Emakumeon Plazatik Zezen Suzkoa irtengo da.
Antolatzailea: Ero Etxe Elkartea.
20:00. Aurrera Kirol elkartearen danborrada.
22:30. Txosnagunean Sangre de Monos taldearen kontzertua.
Ondoren, DJ Jotatxo.