«Tabernetako giroaz aparte, beste balio batzuetan oinarritutako festa eredu bat bultzatu nahi dugu eta aldarrikatu txosnagunea ere badela inauterien parte», aipatu dute batzordeko kideek.
Entzun txosnaguneko kideei egindako elkarrizketa:
Eraso sexista eta homofoborik gabeko gunea izango da Euskal Herria plazakoa. Gune euskalduna, ingurumenarekiko errespetuzkoa eta alternatiboa. Eragile bakoitzak launa pankarta jarriko ditu txosnagunean aldarri ezberdinekin eta inauterietarako propio prestatuko dekorazioa ere jarriko dute: globoak, telak eta mozorroak.
Karpa erraldoi baten babesean antolatuko da gune alternatiboa. Sartu eta eskuinetara egongo da oholtza eta bertan ariko dira egunez egun musika taldeak. Sartu eta parez pare, berriz, hamabost metro luze den barra jarriko dute edariak zerbitzatzeko.
Egunero 12:00etan zabalduko dira ateak eta goizeko 6:00ak arteko muga izango dute: «Ibiliko den jendearen arabera itxiko dugu txosnagunea. Zaldunita eta Astelenita izaten dira jendetsuenak eta pentsatzekoa da bi horietan berandu arte edukiko dugula irekita». Lehen aldiz, Asteartita egunez gunea zabaltzea erabaki dute txosna batzordeko kideek: «Azken gertakariak medio indartsu gaude eta geure aldarrikapenak inauterietara ekarri nahi ditugu. Oraindik zehazteke, baina egun osoko egitaraua prestatuko dugu Tolosako Gazte Asanbladatik».
Eskaintza oparoa egin asmo dute Tolosako inauterietako txosnagunean eta bueltan jasotzeko esperantza ere badute: «Batzordean biltzen garen eragileok gune aske bat sortzeko ahalegina egin dugu baina, aldi berean, guretzat garrantzizkoa izango da bertatik jasotako ekarpen ekonomikoa, urte osoan zehar geure ekimenak aurrera ateratzeko baliatuko baitugu». Egunez eguneko txandak osatzeko beste hainbat eragileren laguntza izango dute txosna batzordeko kideek.
BERTSO BUSTIAK, TXOZNAKO BARRATIK IDATZIAK
(doinua: Pello Ziri Ziri)
Gazteon egoera
txarra den honetan,
lan prekario eta
baldintza txarretan.
Zeinen erraz jaten dun
handiak txikia,
beraien “progresoa”
gure mixeria…
Bada garaia honi
emateko buelta
horretarako txozna
baño hobeik ezta.
Aisi alternatiba
sortzeaz gainera,
bertatik eragile
asko bizi gera:
Aiiii, Aiiiii….
Txoznagune maite!
Euskal Herrian parte,
ta ez utzi aparte!
Batetik Euskal Herri
Sozialista dago
sisteman logikari
eginaz hordago.
Baño dirua erruz
utzi zazu nahita,
iraultza egiteko
beharrezko baita.
Beste aldetik degu
Gazte Asanblada
ta #EzpalaAurrera
bere oihua da.
Aurten txoznan sartu da
okupa moduan
edari denak daude
“Huste arriskuan”
Aiii,aiii….
Ernai ere hor dago
asterikan aste,
ezinbesteko tresna
izateko aske.
Gaztek nahi dituztenez
aktibo ta ernai,
juergaro hor dabiltza
eguzkiaren zai
Ikasle Abertzaleak
beharko aipatu
eskola eredua
nahi dute aldatu.
Oso militantea
degu gure IA
horregatik penkatzen
dute dena ia…
Aiiii, aiiii…
Otsabiko gazteek
aze aleginak
Jatorkin-go pertsonen
lanerako griñak.
Bilgune feminista
da gure eredu
jai eredu sanoen
alde baikaude gu.
Ikusi al dezue
ze kartelazoa!
Euskal musikaz blaituz
jai giro gozoa.
Batzuk juergara eta
besteak lanera
barraren bi aldetan
elkartuko gera!