Distantzia. Asteburua laburbiltzen duen hitza. Esanahia, ordea, anitza:
Alde batetik, larunbatean argi eta garbi geratu zen Tolosaren eta Zumaiako Pulporen artean dagoen aldea une honetan. Tolosarrak sailkapeneko lehen tokian; gorritxoak, berriz, azken lekuan. Partida tarte horren erakusle izan zen. Hasieratik bukaerara nagusi izan zen Tolosa, eta ezer gutxi egin ahal izan zuten zumaiarrek. Iñigo Arratibel (6) eta Iker Ortiz (5) izan ziren goleatzaile nagusiak.
Bestalde, arerioekiko distantzia. Hau ere, gero eta handiagoa. Gero eta liderrago da Tolosa. Trapagaran bigarren sailkatuak Anaitasuna hirugarrenaren etxean galdu zuen, eta Eibarrek berdindu egin zuen Errenterian. Gauzak honela, lau puntuko aldea ateratzen dio Trapagarani, eta bost Anaitasuna eta Uharteri.
Datorren larunbatean, Alex Noguesen taldeak Barakaldon jokatuko du. Jarrai dezala festak!
Aurkari zuzenaren aurka, kale
Bigarren taldeak, berriz, 34-28 galdu zuen Ordiziaren aurka, sailkapenaren beheko postuak ekiditeko arerio zuzenetako baten kontra. Etxeko taldea izan zen nagusi neurketa osoan zehar. Dena den, lasaitasuna ematen dien tartea dute tolosarrek beren alde. Larunbatean Usabalen jokatuko dute Urdulizen aurka.