Jende gehien biltzen duten egunetan trafikoa kudeatzeko errefortzua osatuko dute 12 langileek, eta oinarriak plazaratu ditu udalak.
Batetik 16 urteak beteta izatea ezinbestekoa izango da eta, era berean, eskola graduatua, lehen mailako Lanbide Heziketa ziurtagiria edo baliokideren bat izan beharko da, gutxienez. Eginbeharrak behar bezala betetzeko gaixotasun edo ezintasun fisikoak ere traba izango dira lanpostuak eskuratzeko eta, azkenik, euskararen erabilera zuzena beharko dute, bete-beharrak eskatzen duen mailan.
Aipatzekoa da, udaleko euskara zerbitzuko teknikariek probatxoa egingo dietela hautagaiei, euskara maila ziurtatzeko, datorren urtarrilaren 28an; azterketa horrek ez du balio ofizialik izango, eta lanpostua eskuratzeko bidea baino ez da izango. Dena den, hautagaiek bigarren hizkuntza eskakizuna edo goragokoren bat baldin badute, ez dute azterketa egin beharrik izango.
Irizpide horiez gain, epaimahaiak kontuan hartuko du hautagaiak, aurrez, lanpostuarekin lotura duten jardunetan aritu izana eta larrialdi eta babes zibilean eskarmentua izatea.
Urtarrilaren 26an itxiko dute izen-emate epea, 13:00ean, eta, ordura arte, www.tolosa.eus edo udaletxeko erregistroan eskuratu ahal izango dira oinarri zehatzak eta izen-emate dokumentua.