Azkenik, proposamen ezberdinak eztabaidatu ostean Gaztetxe baten beharra genuela ikusi genuen eta horregatik erabaki genuen uztailaren 24an Larramendi auzoko eraikin bat okupatzea. Bertan hainbat orduz egon ginen auzolanean, eraikina txukuntzen, ametsa egi bihurtzen, baina egunean bertan kanporatuak izan ginen.
Tolosako gazteon errealitatea aldatzen jarraitzeko indarrez jarraitu genuen gaztetxea ez lortu arren eta horren isla izan zen Gazteburua. Hiru egunetan zehar Tolosako gazteok Tolosako gazteontzat antolaturiko ekintza pilaz betea. Egun arrakastatsu hori igarota berriro ere gure artean biltzen hasi ginen gazteok jasaten ditugun arazoei konponbidea eman nahian.
Nazkatuta baikaude Gazteok herri honetan pairatzen ditugun arazoetaz: Etxebizitza eskuratzeko ezintasuna, lan baldintza prekarioak, aisi eredua… Arazo hauen muina guri dena eginda ematen digutela da, helduek sortzen dutela gure bizi eredua eta gu ez gaude horrekin ados. Gazteok ez dugu helduek esaten dutena egin nahi gure kabuz bilduz eta erabakiz lortuko baitugu jasaten dugun errealitatea aldatzea. Horregatik berriro ere pauso bat ematea erabaki dugu, hobeto esanda salto bat, Gaztetxera saltoa. Gure ustez gaztetxea oso tresna baliotsua da aldaketa aurrera emateko.
Gazteok argi dugu: Horma hauek koloreztatuz, gazteok batuz eta borrokatuz gure errealitatea aldatuko dugu!