Tolosako Udalaren kale garbiketako ordenantza astelehenetik aurrera jarriko da indarrean. "Informazio eta publizitate jokabide egokiak, era txukun eta jasangarrian garatzea" da udalaren helburua.
Hori dela eta, kartelak publizitate paneletan edo udal eraikinetako iragarki-tauletan jarri beharko dira. Kendu egingo dira eremu horretatik kanpo dauden iragarkiak.
Publizitate euskarri bakoitzean kartel bat besterik ezin izango da jarri, eta errespetatu egin beharko dira lehendik jarritakoak, baldin eta indarrean badaude. Publizitateak ez du azaleraren ehuneko hogei baino gehiago hartu behar. Udaleko bandoarentzako, berriz, gune berezi bat izango da panel horietan.
Halaber, horma publiko nahiz pribatuetan jarritako kartelen garbiketa eta kontrola gauzatuko dela jakinarazi du udalak ohar bidez, herritarren ahalegina eskatzearekin batera.
Patxi Amantegi zinegotziak "ezinbestekotzat" jo du kartelentzat leku aproposa bilatzea: "Tolosa bezalako herri dinamiko batek ezin besteko ditu antolatzen diren ekintzen berri ematea, baina kaleak kartelez josita agertzen dira eta leku apropos bat behar dute".
Jendearen artean erantzun "ona" izango duela uste du, eta errespetatzeko deia luzatu du, baita udalari ere: "Kontutan izan behar dugu udala dela kartel gehien jartzen dituen erakundea, beraz guztiok dugu zeregina".