Pasa den asteazkenetik igandera 14. Klarinete Maratoia ospatu zuten Zumaian, eta 9 eta 14 urte bitarteko Tolosako Udal Musika eskolako 20 ikaslek hartu zuten parte, Jasone Etxebeste irakasleak lagunduta.
Lehen lau egunetan, arratsaldez, ekintza ezberdinak burutu zituzten, taldekako entseguak edota mintegiak, besteak beste. Aipagarrienak, ordea, Carlos Casado Madrilgo Orkestran aritzen den klarinete-joleak eskaini zituen eskolak izan ziren. Tolosako bi ikaslek berarekin bakarka aritzeko aukera izan zuten.
Launaka, onenak
Duela hiru urte maratoi honen barruan laukoteen lehiaketa bat egiten hasi ziren. Aurten, bada, lau sari lortu dituzte tolosarrek. 12-14 urte bitartekoen mailan, adibidez, txapeldunak eta txapeldunordeak izan dira Tolosako bi taldeak. 9-11 bitartekoen artean, berriz, bigarren eta hirugarren egin dute.
Etxebeste pozik zegoen: "Horrelako ekimenek, eta gainera saria irabazteak, motibagarriak dira ikasleentzat. Eskertzekoa da baita ikastetxeen jarrera, mintegiak iraun duen bitartean klaseak galtzeko oztoporik jarri ez dutelako".
Gabonetan gehiago
Tolosako Udal Musika Eskolako ikasleek Gabonetan kalera irteten jarraituko dute. Tolosa&Co Merkatari Elkartearen eskutik hainbat kalejira egingo dituzte Tolosako kaleetan zehar. Hiru talde irtengo dira: ikasleen banda, akordeoilariak eta klarinete taldeak.