Lehen set-ean, munduko txapeldunek ihes egin zien urdinei, eta ohartzerako 15 tantora iritsi ziren.
Bigarrengoan Antxon-Izagirrek argi zuten akats bera ezin zutela egin. Eta lortu zuten. Markagailuan parean joan ziren une oro, 14na jarriz. Azken tantoa, ordea, berriro Barandika-Lekerikaren aldera joan zen, bigarren set-a, partida eta txapela lortuz. Final ikusgarria jokatu zuten lau pilotariek Tolosako Beotibarren, 300 ikusle ingururen aurrean. Lekerika atzelariaren erakustaldia, berriz, azpimarratzekoa.
Hirugarren postua Landa-Ekhirentzat izan zen, eta laugarrena, Aimar-Andonegirentzat.
Erreakzioak
Arkaitz Izagirre, txapeldun ordea
«Aurkariek asko jokatzen zuten. Nabari zen betidanik elkarrekin ibili direla; txikitatik Gernikako eskolan. Antxon eta biok nahiko ondo moldatu gara txapelketan zehar, eta gustura nago».
«Lehen set-ean nahiko gaizki ibili gara, eta alde egin digute. Konturatzerako beraientzat izan da. Bigarrena gogorragoa izan da, eta 14na berdintzea lortu dugu. Azken tantoan, ordea, ezin izan dugu».
«Maila altuko txapelketa izan da, eta gustura egoteko modukoa da hori».
«Lanean nabil eta entrenatzeko ez dut denbora asko izaten. Etxean jokatzen duzunean beti egoten zara gustura, eta gehiago harmailak horrela ikusita».
Andoni Lertxundi, Beotibar Zesta Punta Elkartea
«Oso pozik gaude. Emozioz beteriko eguna izan da, eta jende asko etorri da».
«Urtero antolatu nahiko genuke Elolaren oroimenezkoa; jendea zesta punta ikustera frontoira ekartzen jarraitzeko».
«Kirol maila oso altua izan da. Iaz lesioengatik etorri izan ezin zutenak hemen izan dira aurten».
«3. eta 4. posturako partida eta finala oso politak izan dira. Maila bikaina erakutsi dute. Pilotari horietatik hiru abenduan Ameriketako Estatu Batuetara doaz zesta puntan jokatzera».
«Lekerika oso gaztea den arren, 21 urte, oso maila altuko pilotaria da. Antxon eta Arkaitz ere oso ondo ibili dira».
Patxi Jauregi, Euskal Herriko Pilota Federazioa
«Giro oso ona egon da eta pilotariek duten maila erakutsi dute, oso partida erakargarriak jokatuz. Espero dugu aurrerantzean ere horrela jarraitzea».
«Zesta puntak gure izaera eta gure sustraiak munduan zehar zabaldu ditu urte askoan zehar».
«Gernikako forotik hona bi urte pasa dira. Zesta puntaren egoera aztertzeko eta ondorio batera iristeko egin genuen. Zerbait egin beharra zegoela ikusi zen».
«Urte hasieran Euskal Herriko zesta punta zirkuitua jarriko dugu martxan, federaziotik eta elkarteetatik. Instituzioak ere batzen hasi zaizkigu. Herriz herri jokatuko dira txapelketak, 8-10 bat, eta Elolaren Oroimenezkoa bat izango da».