Goizetik nabari zen giro ona Tolosan. Jende ugari gerturatu da Triangulo plazaren eta Zerkausiaren arteko festa girora. Larunbateroko ohiko azokak Triangulo plaza hartu du saltoki bilakatzeko, eta Zerkausia lau egunez jan eta edanerako txoko bilakatu dute. Triangulon jarri duten izotz pistak, berriz, txikien eta helduen ikusmina sortu du. Eta haur ugari animatu da patinak jantzi eta patinatzera. Ipurdikoak ipurdiko, umore onean ibili dira.
Txuletaren Festak, mahai dotoreekin, jatetxe erraldoi bilakatu du Zerkausiaren alde bat, eta beste aldean berriz, Zizka Mizka Koxka ekimenak pintxo ezberdinak eskaini ditu. Datozen hiru egunetan ere izango da zer edan eta zer dastatu. Gaur goizean, gainera, hitzaldia eta tailerra ere eskaini dituzte, eta pintxo bereziek, tolosar eta kanpotar ugari bildu dute.
Bazkaltzeko ordua iristean berriz, mahai guztiak jatun onez bete dira. Ohiko menua dastatu ahal izan dute, eta nola ez txuleta usainik ez da faltatu.