Eusko Jaurlaritzak hamar euskal udalerriren eredua aurkeztuko du datorren astelehenetik abenduaren 11ra bitarte Parisen egingo den Klima Aldaketaren Goi Bileran, eta horien artean da Tolosarena.
Hori dela eta, Eusko Jaurlaritzako Ingurumen Sailburuak, Ana Oregik, aitortza publikoa egin die hamar udalerri horiei, isuriak murriztea helburu duen Compact of Mayors ekimen globalean atxikitzeagatik. Asteazkenean egin zuten ekitaldia Kursaal aretoan, eta Patxi Amantegi Ingurumen zinegotziak jaso zuen aitortza hori Tolosako Udalaren izenean.
Tolosarekin batera, Amurrio, Areatza, Balmaseda, Bilbo, Donostia, Durango, Errenteria, Gasteiz eta Legazpi aitortu dituzte.
Gas isuriak murriztea helburu
Compact of Mayors ekimenaren xedea, tokiko gobernuak bilduz "mundu mailako ahalegin kooperatiborik handiena" egitea da, berotegi-efektuko gasen isuriak murrizteko eta klima-aldaketaren inpaktuen aurrean prestatzeko. Horretarako, berotegi-efektuko gas isurien inbentarioa egin, edota klima-urrakortasunak eta klima-aldaketaren aurka borrokatzeko planak aurkeztu behar dituzte. Tolosa udalerri aitzindarietako bat da horretan, 2009. urtetik hain zuzen.