Gipuzkoako Foru Aldundiarekin elkarlanean Lankuk martxan jarritako egitasmoa da. Iaz jarri zuten abian adineko lau zentrotan eta aurten 11 egoitzetara zabaldu dute. Beste hainbeste bertso saio eskaini dira.
Agurra kantatu ondoren, zortziko txikian, zortziko handian, puntutan... aritu dira Tolosan Peñagarikano eta Agirre. Egoiliar batek jarritako gaiari ere erantzun behar izan diote, aitona-bilobaren paperean jarrita. Kantuz borobildu dute saioan eta hor joan dira Aitorren hizkuntz zaharra, Artillero dale fuego, Txoria-txori, Gernikako arbola...