Laburra bezain intentsoa izan da aurtengo abesbatza lehiaketa, Tolosan. Ganbera abesbatzak eta haurrenak izan dira protagonista, eta bi egunetan ahotsaren magiaz liluratu dituzte Leidor aretoko ikus-entzuleak.
Sario guztietara joaten diren entzuleen, nahiz batzuetara soilik bertaratzen direnek, gustuko izaten dute, gaurko sari banaketa ekitaldiaren aurretik, pronostikoak egitea. Eta, egiazki, belarria ondo finduta dute askok eta askok: Mikrokosmos abesbatzaren artea ezbaian jarri ezinezkoa da, haien emanaldi bat entzuten duenarentzat.
Hain zuzen ere, horretan saiatu da Loïc Pierre zuzendaria: "Lehiaketa bat baino, kontzertu bat prestatu dugu hona etortzeko, abestien artean isiltasuna mantenduz, antzerkia eta abesbatza uztartuz". Izan ere, talde berritzailea da frantziarra, eta gaur egungo obrak jorratzen dituzte beren errepertorioan.
Mikrokosmos abesbatza ezaguna da, gainera, Tolosan, behin baino gehiagotan parte hartu izan baitu lehiaketan. Bigarren postuak eskuratu izan dituzte eta, parte hartu zuten aurreko aldian, puntuaziorik altuena jaso bazuten ere, kanporatu egin zituzten, emanaldi luzeegia eskaintzeagatik.
Gaur, ordea, eskura zitzaketen txapela guztiak eskuratu dituzte frantziar gazteek, abesbatzen inguruko estereotipoak erabat hautsiz, eta koruari abangoardia ukitua emanez. Polifonia, folklore, ikuslego eta sari nagusiaren jabe eginik, Tolosako Abesbatza Lehiaketa ordezkatuko dute, 2016an, Varnako (Bulgaria) Europako sari nagusian.
Etorkizun dirdiratsua duten ahotsak
Mikrokosmos abesbatzak moldeak puskatzen baditu, Herrialde Katalanetako Cor Infantil Amics de la Unió-ren lana ere bide bertsutik joan da oholtzan. Dantza eta interpretazioa oparitu zizkioten, atzo, haur abesbatzen saioan eta, noski, horri guztiari, eskainitako obren interpretazio fina ere bai.
Horrela, bada, herrialde eslaviarren tradiziozko itzala gainditu, eta Josep Vila Joverren neska-mutilek lehen saria eskuratu dute, haur abesbatzen sailean.
Ikusi, jarraian, epaimahaiaren erabakia:
IKUSLEGOAREN DV SARIA
MIKROKOSMOS - FRANTZIA
EUSKAL OBRA BATEN INTERPRETAZIO ONENAREN EUSKO JAURLARITZAREN SARIA
EMILS DARZINS MIXED CHOIR - LETONIA
Xabier Sarasolaren MAITEAGOAK obraren interpretazioagatik.
HAUR ABESBATZAK
HIRUGARREN SARIA
GIRLS CHOIR OF THE MUSAMARI CHORAL SCHOOL - ESTONIA
BIGARREN SARIA
GIRL’S CHOIR OF RIGA CATHEDRAL “TIARA” - LETONIA
LEHEN SARIA
COR INFANTIL AMICS DE LA UNIO - KATALUNIA
GANBERA ABESBATZAK- POLIFONIA
HIRUGARREN SARIA
CANTUS - NORVEGIA
BIGARREN SARIA
SUGINAMI GAKUIN HIGH SCHOOL & KIKUKA ENSEMBLE - JAPONIA
LEHEN SARIA
MIKROKOSMOS - FRANTZIA
GANBERA ABESBATZAK - FOLKLOREA
HIRUGARREN SARIA
EMILS DARZINS MIXED CHOIR - LETONIA
BIGARREN SARIA
SUGINAMI GAKUIN HIGH SCHOOL & KIKUKA ENSEMBLE - JAPONIA
LEHEN SARIA
MIKROKOSMOS - FRANTZIA
KUTXA SARI NAGUSIA ETA 2016AN VARNAN (BULGARIA) OSPATUKO DUTEN ABESBATZEN EUROPAKO SARI NAGUSIRAKO SAILKAPENA
MIKROKOSMOS - FRANTZIA