Leidor Antzokian hiru saio egin dituzte gaurkoan. Goizean haurrak aritu dira, eta arratsaldean, polifonia eta folklorean, helduagoak. Lehia, beraz, gaur amaitu da. Gaueko ordu txikietan jakingo da urtero bezala sarituak zeintzuk izango diren biharko itxiera ekitaldian.
Arratsaldean lau koru ikusi ditugu Leidorko oholtza gainean. Ikusleak berotzen joan dira, eta polifonian ez bezala, folklorean txaloak erraztasunez jo dituzte.
Letoniako Emil Darzins Chamber Choir-ek aho zapore ona utzi du, eta abesbatza sendo moduan azaldu da. Argentinako Tous Ensenble eta Estatu Batuetako Cwu Chamber Choir ere modu berean ibili dira, polifonian horrenbesteko distirarik ez baldin badute erakutsi ere. Ukitu berezia japoniarrek eman diote arratsaldeko saioari. Suginami Gakuin High School & Kikura Ensemblekoen magia egin dute ahotsarekin; efektu espezialen pare, harritzeko sentsazioak zabaldu dituzte Leidorren barrena. Euren maila nolakoa izan den erabakitzea, ordea, epaimahaiaren eta ikusleen lana izango da.
Emil Darzins Chamber (Letonia)
Tous Ensemble (Argentina)
Cwu Chamber Choir (Ameriketako Estatu Batuak)
Suginami Gakuin High School & Kikula Ensemble (Japonia)