Ikono baten beharra zuten, Tolosako Casino elkartekoek, duela bospasei urte berreskuratu eta urtez urte berritzen ari diren Mikologika asterako. Horrela, artxiboko irudi batek ireki zizkien irudimenaren ateak, izan ere, garai bateko jardunaldi mikologikoak iragartzeko, harrizko perretxiko erraldoi bat jartzen omen zen Trianguloa plazan.
Casinoko kideak eskultura hura bilatzen aritu dira, baina, saiakerak saiaketa, ez dute aurkitu eta, beraz, irudi berri bat sortzea erabaki dute. Iñaki Moyua tolosarraren trebeziari deituz, beraz, perretxiko itxurako panpina berria aurkeztu zuten, atzo, Zerkausiko ekitaldi gastronomikoan.
Perretxikoari izen bat jartzeko hasita, Casinorekin ezin hobeto identifikatzeko, Txapel Haundi izena aukeratu dute, beren txarangaren izen berbera. Horrela, aurrerantzean, Mikologikako jarduera eta hitzordu guztietan izango da Txapel Haundi.