Eitb.eus-ek jakinarazi duenez, Madrilgo Fiskaltzak ikerketa izapideak jarri ditu abian Zerga Agentziaren salaketa baten harira, Xabi Alonsok zerga iruzurra egin ote duen argitze aldera.
Fiskaltzako iturriek jakitera eman dutenez, informazioa aztertzen ari dira oraindik, beraz, ez dakite zigor auzibiderik abiatuko ote duten.
El Mundo egunkariak gaur argitaratu duenaren arabera, "2010 eta 2012 artean tolosarrak irudi eskubideak kobratzeko garaian atzerriko enpresak erabili ote zituen ikertzen ari dira".
Xabi Alonsok agiri bat argitaratu du bere Twitter kontuan, eta "betebehar fiskal guztiak beti" bete dituela ziurtatu du, eta bere "eskubideen aldeko defentsa" egingo duela. Era berean, justiziaren erabakia "errespetuz" hartuko duela jakinarazi du.