Abuztuaren amaieran izan zen Tolosako Bolei Txapelketa. Ordurako, ordea, herrian kirol hau sustatzeko ideia bazuten txapelketako antolatzaileek, baina horretarako garrantzitsuena falta zuten: praktikatzeko leku bat.
Hainbat saiakeren ondoren, lortu dute toki hori: Zezen Plaza. Hasiera batean, bertan egongo da urriaren bigarren astera arte.
Nahi duen orok jokatu ahal izango du, baina horretarako giltza eskuratu beharko da, plazaren ondoan dagoen Ixkiña tabernan. Hara joan eta izena eman beharko da. Zezen Plazara sartzeko, berriz, atzeko atea erabiliko da. Asteburuetan, berriz, ordua hartzeko tolobolei@gmail.com helbidera idatzi beharko da. Baloiak bertan izango dira denen eskura.
Boleia errotzea helburu
Modu horretara, boleiak herrian zenbateko arrakasta duen aztertu nahi dute, izan ere, gerorako ideiak ere baditu talde honek: "Jendea animatuko balitz, talde bat sortu nahiko genuke". Horretarako, jende gaztea erakarri nahi dute kirol hau praktikatzera: "Denak animatu nahi ditugu, baina bereziki gaztetxoak".