Julian Rodriguez Gainditzen elkarteko kideak azaldu duenez, interprete gehiago izateak "ikasteko eta lanerako aukera gehiago irekitzen ditu. Pertsona gorrek entzuleen gaitasun berdinak ditugu, bai lanerako eta baita ikasteko. Behar duguna da gure beharretara moldatzea eta horretarako interpreteak behar dira".
Sentsibilizazio Astearen barruan, hainbat ekitaldi egin dituzte gaur Tolosan. "Garai batean ekintzak barruan egiten genituen, baina konturatu ginen kanpoan egin behar genituela, jendeak ikusteko", zehaztu du Rodriguezek. Horrela, eguerdian batukada talde bat aritu da Tolosako kaleak alaitzen, eta bide batez, jendea erakartzeko. Horren ondoren, Plaza Zaharrean El Grito talde madrildarrak antzezlana eskaini du zeinu hizkuntzan.
Segidan marrazki lehiaketaren sari banaketa egin da. Aritz Eizagirre, Jone Maiza eta Mikel Gorostiaga izan dira, hurrenez hurren, lehen hiru sariak jaso dituztenak. Rodriguezek azaldu duenez, "marrazki lehiaketak haurrak sentsibilizatzeko balio du. Urte asko daramatzagu lehiaketa hau egiten, eta azkenean haurrek jakiten dituzte komunikatzeko ditugun arazoak. Honek ekarri du gaur egun haur askok jakitea zein behar dituzten pertsona gorrek".
Arratsaldean ere beste zenbait ekitaldi izan dituzte, tartean Jose Luis Garcia Ginard bidaiariaren hitzaldia. 14 herrialdetan aritu da bi urtez bidaiatzen bizikletaz (albistearen bideoan bidaiaren nondik norakoak azaltzen ditu Garcia Ginard berak).