Finaleko ateetan geratu zen Caminos. Bi puntu besterik ez zitzaizkion falta izan, eta azkenean zortzigarren amaitu zuen. "Maila handia zegoen, eta parte hartu dudan lehen aldia izateko emaitza ona dela uste dut" azaldu dio tolosarrak TOLOSALDEKO ATARIA-ri.
Taldekakoan ere domina lortzear izan zen. Lehen postuan zihoazela, taldekideetako bat erori egin zen eta azkenean laugarren postuan amaitu zuten. "Pena izan zen".
Munduko Txapelketan bizitako esperientzia oro har "oso ona" izan dela aitortu du Caminosek: "Trial eta mendi bizikletako txapelketak ere jokatu dira, eta lehiatzea egokitzen ez zitzaigunetan, beste probak ikusteko aukera izan dugu".
Bi aste barru, denboraldiari agur esateko Munduko Kopako azken jardunaldia jokatuko du. Une honetan zazpigarren lekuan da sailkapen nagusian.