Martxoan, TVEn eskainitako erreportaje batean Rafael Verak esan zuen, "gerra zikina hanka-sartze legala" izan zela, baina "ikuspuntu praktikotik bere papera" izan zuela. Ildo beretik adierazi zuen Frantziak kolaboratzeko lagundu zuela GALen jardunak, talde terroristak hori egin izan ez balu "Frantziak ez zuela kolaboratzeko presarik izango".
GALek torturatu eta eraildako Joxi Zabala tolosarraren arrebak, Pili Zabalak, adierazpen horien entzun ostean salaketa aurkeztu zuen EAEko fiskaltzaren aurrean. Biktima gisa "umiliatuta" sentitu eta Verak terrorismoa goratu zuela argudiatu zuen Zabalak salaketan. Juan Calparsorok, EAEKo fiskalburuak salaketa aintzakotzat hartu eta Madrilgo Fiskaltza Nagusiari erregua bidali zion Rafael Verak ikertu gisa agerraldia egin zezan. Uztailaren 23an deklaratu zuen Madrilen.
"Verak emandako azalpenen arabera, bere asmoa ez zen biktimak umiliatzea, momentu historiko horren inguruko azalpenak ematea baizik". Horrela nabarmendu du Juan Calparsorok irrati kate bati eskainitako elkarrizketan, behin deklarazioa irakurrita. EAEko fiskalburuak aurki hartuko du auziaren inguruko erabakia eta delitu zantzuak ikusten baditu, salaketa jarriko du epaitegian.
Rafael Verari, 10 urteko espetxe zigorra ezarri zioten Segundo Mareyren bahiketan parte hartzeagatik eta estatuko diru funtsak bidegabeki erabiltzeagatik.