Espainiako Auzitegi Nazionalak GALen hogei biktimak jarritako helegiteei erantzun zien atzo, senitartekoei kalte-ordainak ukatuz; GALek hil zituen arren, biktimak ETAko kide zirela azaldu du Auzitegi Nazionalak, erabakia argudiatzeko.
Barne Ministerioak diru laguntzak eten zizkien GALen biktima horiei, eta orduan helegitea jarri zuten, besteak beste, Joxan Lasa tolosarraren senideek; Josu Muguruzaren senitartekoek ere erabaki bera hartu zuten. Aipatzekoa da, Egin egunkariko sortzaile Angel Etxanizen familiari helegitea onartu diola auzitegiak.
2012. urtean aldatu zuen, PPren gobernuak, biktimen legea eta, aldaketa horren bitartez, Espainiako Gobernuak kalte-ordainak ukatu zizkion estatu indarkeria jasandako hainbat biktimari, biktima horiek lehenagotik «terrorismoaren biktima» gisa onartuta egon arren.
Biktimen legea aldatzeko, Espainiako Barne Ministerioak Indarkeria Delituen Biktimen Kalte-ordainei Buruzko Europako Hitzarmena hartu zuen oinarri eta, orain ere, Auzitegi Nazionalak hitzarmen horixe bera erabili du Joxan Lasaren senitartekoei kalte-ordainak ukatu izana argudiatzeko.
Hitzarmeneko zortzigarren puntua darabilte, eta polemika sortu izan du. Artikuluak dioenez, kalte-ordainak murriztu edo ken daitezke biktimak indarkeria delituak egin baditu edo horiek egiten dituen erakunde batean parte hartzen badu. Eusko Jaurlaritzaren Kriminologia Institutuak berak esana du, ordea, Barne Ministerioak Espainiako Poliziaren eta Guardia Zibilaren txosten ugaritan oinarrituta, nahastu dituela zenbait biktima «ETAren inguruarekin», horrela, kalte ordainak kentzeko.