Juan Garmendia Larrañagak sanjoanetako egitarauko ezinbesteko hitzordu bilakatu zuen, ia, ekaina amaierako liburu aurkezpena. Urtarrilean zendu zenez, ordea, aurten bazirudien hainbat tolosarren agendako hutsune izango zela kultura gizonaren ale berri bat ezagutzea.
Baina hutsunea nolabait bete dute haren ingurukoek, eta omenalditik haragoko zerbait izan zen, atzo, Topic zentroko aretoan. Tolosako Udala, ikaskide izandakoak, lagunak, lagun bilakatutako lankideak, senideak, Arimaz orkestra,... eta beste hainbat elkartu ziren bertan, emari amaigabea zuen gizona omentzeko.
Emari amaigabea, ez baitzen omenaldi soila izan: Juan Garmendia Larrañagak idatzita utzi zuen azken liburua aurkezteko ere balio izan zuen ekitaldiak: Manuel Jose de Zavala, Conde de Villafuertes. Disposiciones testamentarias, 1831-1842.