Euskal Herriko Unibertsitateko ehunka ikaslek graduazio ekitaldia izan zuten, ostiralean, medikuntzako ikasketak amaituta. Norbere diploma, banda eta argazkien gainetik, ordea, aldarrikapen nagusi batekin oholtzaratzeko kemena bildu zuten Medikuntza euskaldundu taldeko kideek.
Txoan Ormazabal tolosarrarekin batera, bigarren zikloa EAEko herrialde guztietako ospitaleetan ikasi duten medikuak ere igo ziren agertokira, urte horietan guztietan bizi izandakoa salatzeko. Guztiaren gainetik, EHUn medikuntza euskaraz ikastea ezinezkoa dela azpimarratu zuten, eta errektore, errektoreorde nahiz euskara batzordeari egotzi zieten ardura nagusia: "Ez gara bigarren mailako ikasleak. Euskaraz lan egin eta bizi nahi dugu".
Ekitaldian eskainitako diskurtsoaren bideoak sua piztu du sarean, eta bolo-bolo dabil Twitter nahiz Facebooken.