Herritarren babesari eske duela lau urte beren buruari jarritako hainbat erronkatara iristea lortu dutela esanez zabaldu du agerraldia Amaia Azkue Berastegiko alkategaiak. Bere alboan Gorka Egia Orendaingo alkategaia ere hizlari izan du, eta baita Tolosaldeko EH Bilduko alkategaiak ere.
Besteak beste, hondakinen bilketa tasan izandako gorakada nabarmendu dute lehenik, eta baita fiskalitatean emandako pausoa ere: "Hondakinen kudeaketan fiskalitatea aldatuz, gehien birziklatzen dutenek gutxiago ordaintzen dute gaur egun".
Bide beretik, "herritarrei euskarazko informazioa bermatzeko" lan egin dutela ere nabarmendu dute, eskualdeko euskarazko komunikabideen bateratze prozesuan "parte hartze aktiboa" izan dutela esanez.
Osasungintzaren inguruan espezialitate batzuk anbulatoriora itzuli izana azpimarratu dute, eta AHTaren inguruan azken urtebetean sorturiko zuloak salatu dituzte.
Azkenik, garapen sozioekonomikoan "ekintzailetasunari emandako bultzada" izan dute hizpide eta, batez ere, parte hartzea beren politikako zehar-lerro bilakatu izanda ildo nagusitzat jo dute.