Tolosako Udalak sustaturiko Kale Biziak proiektuaren adarretako bat da Mugi Tolosa, hirugarren adinekoei ibilbide osasuntsuak proposatzeko egitasmoa. Gaur bertan bigarren zikloa osatu dute, eta lehen zikloaren amaieran gertatu bezalaxe, ekitaldi txiki bat antolatu dute.
Asteazkenero-asteazkenero, dozenaka gizon-emakumek parte hartzen dute ibilbide osasuntsu horiek eginez, eta hamaiketako osasuntsua ere egiten dute amaitutakoan. Horrela, lehen itzuliaren amaieran aterkiak izan ziren bezala, gaur euritako jakak banatu dizkiete ikasturte osoan Mugi Tolosan aritu direnei.
Beste herrientzat eredu
Ibai Iriarte Tolosako alkateak esker hitzak izan ditu hirugarren adineko gizon-emakumeentzat: "ZUek egin duzue bizi proiektu hau, eta jarraitu horrela, izan ere, beste zenbait herrirentzako erreferentzia bilakatu zarete". Bide horretan, Zumarragaren adibidez hizpide izan du, bertan ibilbide osasuntsuak martxan jartzeko asmotan ari baitira.