Joan den larunbatean aurkeztu zuen, hauteskunde zerrenda, Tolosako Euskal Herria Bilduk. Gaur, berriz, programa jendarteratzen hasiko direla jakinarazi dute zenbait hautagaik, Berdura plazan.
Ibai Iriarte alkategaiak azaldu duenez, "hilabeteak" daramatzate, "Tolosako eragileekin eskutik, herriaren diagnosia eginez eta programarako helburuak zehaztuz". Horrela, beraz, duela hilabete gizarte eta kultura eragileekin egin zuten bezala, beste zenbait eragileri ezagutarazi nahi diete, orain, herri programa: "Egitasmoa aberastea da helburua, idatzita dagoena aberasteko aukera izango baitute, datozen lau urteotan".
Lehen hitzordua merkatari eta ostalariek izango dute, bihar bertan, 20:15ean, kultur etxean. Hilaren 30ean, berriz, Usabal kiroldegiko teknifikazio zentroa izango da elkargunean, kirol eragileei egitasmoa aurkezteko, 19:00etan. Azkenik, eragile sozioekonomikoei zuzenduriko beste saio bat ere prestatu dute, eta bertan izango dira, gainera, Gaindegiako Imanol Esnaola eta EHUko irakasle Joseba Garmendia. Saio hori maiatzaren 8an izango da, 19:00etan.
Eragileei bezala, herritarrei ere datozen egunotan iritsiko zaie, postontzira, Tolosako EH Bilduren programa. Bide beretik, gaurtik aurrera, sare sozialen bitartez ere irakurgai izango da egitasmoa, digitalean. Horrela, Ibai Iriartek parte hartzeko eta iritzia azaltzeko deia egin die tolosarrei, aurrez aurre nahiz tolosa@ehbildu.net helbidearen bitartez.